SIR ప్రక్రియలో ప్రతి ఓటరు తన వివరాలను సరిగా మ్యాపింగ్ చేయించుకోవడం చాలా ముఖ్యం. ముఖ్యంగా వివాహం తర్వాత వేరే గ్రామం లేదా పట్టణానికి మారిన మహిళలు, అలాగే 2002 తర్వాత ఓటర్లుగా నమోదైన వారు తమ వివరాలను ఒకసారి తప్పకుండా పరిశీలించుకోవాలి.
వివాహం తర్వాత కొత్త ప్రాంతానికి మారిన మహిళల విషయంలో, వారు ప్రస్తుతం ఉన్న ప్రాంతంలోని 2002 ఓటర్ల జాబితాలో పేరు లేకపోవడం సహజం. అలాంటి సందర్భంలో, పుట్టిన ఊరిలోని 2002 ఓటర్ల జాబితాలో తల్లిదండ్రుల వివరాలు లేదా సంబంధిత కుటుంబ వివరాలను గుర్తించి, ఆ సమాచారాన్ని ప్రస్తుత ప్రాంతంలోని BLOకి అందించడం ద్వారా మ్యాపింగ్ ప్రక్రియను పూర్తి చేసుకోవచ్చు.
2002 ఓటర్ల జాబితా ప్రతి మండల తహసీల్దార్ కార్యాలయం ద్వారా సంబంధిత BLOలకు అందుబాటులో ఉంటుంది. అవసరమైతే మీ పుట్టిన ఊరి BLOని సంప్రదించి సంబంధిత వివరాలను తెలుసుకోవచ్చు.
SIR మ్యాపింగ్లో సాధారణంగా మూడు రకాల ప్రక్రియలు ఉంటాయి.
1. Self Mapping
2002 జాబితాలో కూడా పేరు ఉండి, ప్రస్తుతం ఉన్న ఓటర్ల జాబితాలో కూడా అదే పేరు కొనసాగుతున్న వారికి ఇది వర్తిస్తుంది.
2. Add Progeny
2002లో ఓటు హక్కు వయస్సు లేకపోవడం వల్ల పేరు నమోదు కాకపోయినా, ప్రస్తుతం ఓటరుగా ఉన్నవారు కుటుంబ సభ్యుల (తల్లిదండ్రులు లేదా తాతమ్మల) 2002 వివరాల ఆధారంగా ఈ మ్యాపింగ్ చేయించుకోవచ్చు.
3. Self Progeny
2002లో ఓటు హక్కు వయస్సు ఉన్నప్పటికీ ఏదైనా కారణంతో పేరు నమోదు కాలేదంటే, కుటుంబ సభ్యుల 2002 రికార్డుల ఆధారంగా ఈ మ్యాపింగ్ చేయించుకోవచ్చు.
మ్యాపింగ్ కోసం BLOని కలిసే ముందు, 2002 ఓటర్ల జాబితాలో సంబంధించిన కుటుంబ సభ్యుల వివరాలు, పేజీ లేదా సీరియల్ నంబర్, అలాగే ప్రస్తుత ఓటర్ ID సిద్ధంగా ఉంచుకోవడం మంచిది.
ఓటరు వివరాలు సక్రమంగా ఉండేలా చూసుకోవడం ప్రతి పౌరుడి బాధ్యత. సందేహాలు ఉంటే సంబంధిత BLO లేదా ఎన్నికల అధికారులను సంప్రదించి సరైన మార్గదర్శకత్వం పొందండి.
Comments
Post a Comment