నేటి మోటివేషన్... వెలకట్టలేని వజ్రం

ఒక ఊరిలో ఒక ఒంటరి అవ్వ ఉండేది. కష్టంగా తన పనులు తాను చేసుకుంటుండేది. దూరంగా ఉన్న బావినుంచి నీటిని తెచ్చుకునేందుకు చాలా కష్టపడేది. ఒకరోజు ఆమె బావినుంచి బకెట్ తో నీరు తోడగా అడుగున ఏదో మెరుస్తూ కనిపించింది. 

ఏమిటిది.. ఇంతలా మెరుస్తుందంటూ ఆశ్చర్యంగా తీసి చూసింది. ఎర్రని కెంపు. సూర్యకిరణాలు తాకడంతో మరింత మెరుస్తోంది. ఆహా... ఏమి నా అదష్టం అనుకుంటూ, తీసుకుని తన సంచిలో వేసుకుంది. 

ఇంతలో దాహంతో బావి దగ్గర ఒక యువకుడు వచ్చాడు.

ఆ అవ్వ అతనికి నీళ్లు అందించింది. అతను ఆ నీటిని ఆత్రంగా తాగాడు. అయినా అతని ముఖంలో తీవ్రమైన ఆందోళన కనిపిస్తోంది. అవ్వ అది గమనించి...

’’నాయనా... ఏమైంది? ఎందుకంత ఆందోళనగా ఉన్నావు?‘‘ అని అడిగింది. 

’’ఏం చెప్పేదవ్వా. నా బతుకంతా సమస్యలే. వర్షాల్లేవు. సాగు సాగదు. ఉన్న ఊర్లో పని దొరకడంలేదు. కానీ కుటుంబాన్ని పోషించాలిగా. బతకాలంటే నలుగురికీ నాలుగు వేళ్లు నోటిలోకి పోవాలిగా. అందుకే టౌన్లో ఏదైనా పని దొరుకుతుందేమోనని వెళ్తున్నా. అక్కడ ఎక్కడుండాలో, ఎలా బతకాలో, పని దొరుకుతుందో లేదో...‘‘ అని చెప్పాడు. 

అవ్వ ఒక్క క్షణం ఆలోచించి, తన సంచిలోంచి కెంపు తీసి అతని చేతిలో పెట్టింది. 

’’ఏంటవ్వా.. ఏంటిదీ?‘‘ అని ఆశ్చర్యంతో అడిగాడు. 

’’పర్లేదు నాయనా ఉంచు. ఇప్పుడిది నాకన్నా నీకే ఎక్కువ అవసరం‘‘ అని చెప్పింది. 

’’అది కాదవ్వా. ఇంత విలువైన కెంపు ఏ సంబంధమూ లేని నాకివ్వడం...‘‘ అంటూ సంకోచిస్తూ చెప్పాడు. 

’’పర్లేదులే నాయనా. నాదేముంది ముసలిదాన్ని. నాలుగు మెతుకులు నోట్లోకెళ్తే చాలు. నీకు కుటుంబం ఉంది. పిల్లల చదువులున్నాయి. నీకే బాగా ఉపయోగపడుతుంది‘‘ అని చెప్పింది. 

’’నువ్వు నా పాలిట దేవతవవ్వా‘‘ అని కాళ్లకు మొక్కి పట్టణంవైపుగా సాగిపోయాడు. 

===========

కొన్ని వారాల తరువాత, అవ్వ ఎప్పటిలాగే బావి వద్దకు వెళ్ళింది, అక్కడ మళ్లీ ఆ యువకుడు కనిపించాడు. 

’’ఏంటి నాయనా.. ఏంటి మళ్లీ వచ్చావు? పట్టణంలో పని దొరికిందా? నీ భార్యా పిల్లలు ఎలా ఉన్నారు?‘‘ అని అడిగింది. 

’’అంతా బాగుందవ్వా. నీ మాట చలవవల్ల పట్టణంలో నాకు పని కుదిరింది. ఇంట్లో అందరూ సంతోషంగా ఉన్నారు.‘‘

’’మంచిది నాయనా. వింటుంటే ఆనందంగా ఉంది. మరి మళ్లీ ఎందుకొచ్చావు?‘‘ అని అడిగింది. 

’’ఇదుగో అవ్వా..‘‘ అంటూ కెంపును చేతిలో పెట్టాడు. 

’’ఏంటి నాయనా.. ఏంటిది? నీ అవసరాలకు ఉపయోగించుకోమని చెప్పాగా. ఇదివ్వడానికే వచ్ఛావా?‘‘ అంటూ నిష్టూరంగా మాట్లాడింది.

’’కాదవ్వా. దీనికన్నా విలువైనది నీ నుంచి కోరుకుంటున్నా.‘‘

’’దీనికన్నా విలువైనదా? నా దగ్గరేముంది నాయనా. ఇది కూడా బావిలో దొరికింది. నాకన్నా నీకు అవసరం ఎక్కువని ఇచ్చా. ఇంతకు మించింది నా దగ్గర ఏముంది నాయనా?‘‘ 

’’అది నీ దగ్గరే ఉందవ్వా.‘‘

’’నా దగ్గరే ఉందా? నాకు తెలియకుండా. ఏంటి నాయనా అది?‘‘

’’ముక్కూముఖం తెలియని నాకు, ఒక్క క్షణం కూడా ఆలోచించకుండా ఇంత విలువైన కెంపును ఇచ్చేలా చేసిన నీ దగ్గరున్న వెలకట్టలేని వజ్రం‘‘ అని సమాధానమిచ్చాడు.

అంత వెలకట్టలేని నా దగ్గరేముందబ్బా.. అని అవ్వ ఆలోచిస్తోంది. 

ఆ వజ్రమేమిటో మీకేమైనా తెలిస్తే చెప్పండి. 😊

🏹లక్ష్య🇮🇳స్వచ్చంద📚సేవా🩺సంస్థ